تاند ( پنج شنبه، د حمل ۵ ) چينای سوپرکېنګ لوبډلې راتلونکي آی پي اېل سیالیو لپاره د افغانستان د کرکټ ملي لوبډلې ځوان توپ اچونکی فضل حق فاروقي هم خپل نوملړ کې شامل کړ.
یادې لوبډلې ویلي، فضل حق فاروقي به له دوی سره د نېټ بالر په توګه پاتې شي.
افغان ځوان لوبغاړی فضل حق فاروقي،چې څو ورځې وړاندې د زمبابوې پر وړاندې خپله لومړۍ نړیواله شل اوریزه لوبه ترسره کړه دا دویم ځل دی چې د هند په غوره لیګ لوبو کې
د نېټ بالر په توګه اخیستل کېږي.
افغان کرکټ بورډ د فضل حق فاروقي په اړه لیکلي :« فضل حق فاروقي نن هند ته لاړ، چېرته چې به ای پي ایل کې د چینای سوپر کنګز لوبډلې سره د نېټ بالر په توګه یو ځای شي.»
د معلوماتو له مخې فاروقي به په چیناي سوپرکینګ لوبډله کې د جنوبي افریقا د تېز باولر هاردوس ویلجوین ځای ونیسي.
فاروقي، چې کیڼ لاسی توپ اچوونکی دی تراوسه په ۱۲ لومړی درجه سیالیو کې لوبېدلی او ۲۲ لوبغاړي یې سوځولي دي.
نوموړی تېر کال د کنګز الیون پنجاب لوبډلې سره د نېټ بالر په توګه و.
د فاروقي ترڅنګ سږکال هم درې نور افغان لوبغاړي راشد خان، محمد نبي او مجیب الرحمن د سنرایزر حېدراباد لوبډلې سره لوبېږي.