تاند (چهارشنبه د حمل ۴) د افغانستان د کورنیو چارو وزارت وایي، په تېرو دوو کلونو کې پر کمال خان بند ۳۵ ترهګریزبریدونه شوي دي.

د دغه وزارت ویاند طارق ارین نن چهارشنبه پر خپل ټویټر لیکلي، د دغو بریدونو له کبله ۳۹ امنیتي ساتونکي وژل شوي یا ټپيان شوي او ۲۸ نور د طالبانو له خوا بندیان شوي دي.

د ارین په خبره، په دې بند ۹۸ بریدونه شنډ شوي او دغه راز هغه څلور ماینونه هم کشف شوي چې د بند شاوخوا ځای پر ځای شوي وو.

په وروستيو دوه کالو کې ۳۵ برېدونه او چاودنې په کمال خان بند ترسره شويدي. ۳۹ تنه امنيتي او دفاعي ځواکونه شهيدان او ټپيان شوي او ۲۸ تنه نور د طالبانو لخوا بنديان شويدي.
۴ کړۍ ماينونو او ۹۸ نور برېدونه خنثا شويدي.

— Tariq Arian (@TariqArian3) March 24, 2021

طالبانو تر اوسه په دې هکله خپل نظر نه دی څرګند کړی.

د کورنیو چارو وزارت ویاند په داسې مهال دغه څرګندونې کوي چې نن د ولسمشر غني له لوري په رسمي توګه د کمال خان بند پرانیستل شو.

ښاغلي غني د کمال خان بند له پرانیستلو وروسته په نیمروز کې یوې ولسي غونډې ته په خبرو کې وویل چې نور ګاونډي هېواد ایران ته وړیا اوبه نه ورکوي او په خبره یې د تېلو یا نورو توکو په بدل کې یې پرې خرڅوي.

نوموړي وویل، اوس تر پخوا د اوبو مدیریت ته ښه زمېنه برابره شوې ده او په وینا یې چې د افغانستان ټولې اوبه به مهار کړل شي.

ولسمشر زیاته کړه چې طالبانو تېر کال د نږدې یو میلیارد ډالرو په ارزښت تاسیسات وران کړي دي.

خو د طالبانو ویاند ذبیح الله مجاهد ویلي چې دوی په جګړه کې مالي زیان نه ‌دی اړولی، بلکې د حکومت د ننه فساد د دې لامل شوی چې ملیونونه ډالر حیف ‌ومیل شي.

کمال خان بند د نیمروز په چهار بورجک ولسوالۍ کې پروت دی چې له مرکز زرنج څخه شاوخوا شل کیلو متره واټن لري.

دا بند د ۵۲ میلیون مکعب متر اوبو د زېرمه کولو او د یولک او ۷۴ زره هکتاره ځمکې د خړوبولو وړتیا لري او تر څنګ یې نهه میګاواټه بریښنا تولیدولای شي.

ولسمشر: نور ګاونډیانو ته وړیا اوبه نه شته، یا به پیسې راکوي یا تېل