تاند (سه شنبه د حمل ۳) طبیعي پېښو ته د رسېدو په چارو کې د دولت وزارت وايي چې په هېواد کې د وروستیو سیلابونو له امله لس تنه مړه شوي او درې نور ټپيان دي.
د دغه وزارت ویاند تمیم عظیمي ویلي چې تېره شپه د سرپل ولایت په بلخاب ولسوالۍ کې د یو کور د چت نړېدو له امله پنځه کسان مړه شوي او دوه نور ټپیان دي.
په همدې حال کې په خوست کې هم د یوه کور چت لوېدلی دی چې په پایله کې یې د یوې کورنۍ پنځه غړي مړه شوي او یو بل ټپي شوی دی.
طبیعي پېښو ته د رسېدو په چارو کې د دولت وزارت د معلوماتو له مخې، په دواړو پېښو کې ښځې او ماشومان هم شامل دي.
باید وویل شي چې له تېرو درېیوو ورځو راهیسې د هېواد په ګڼ شمېر ولایتونو کې د ورښتونه سره مل سېلابونه هم راغلي دي چې خلکو ته زیانونه اړولي دي.
د افغانستان د هوا پيژندنې ادارې تر دې مخکې په ګڼ شمېر ولایتونو کې د باران له امله د سېلابونو راوتلو خبر ورکړی و.