تاند ( شنبه، د حوت ۳۰) افغان ولسمشر محمداشرف غنيکوزې پښتونخوا کې د فلسفي شاعر “غني خان” مزار جوړوي.
ولسمشرغني په دې تړاو خپل وړاندیز هم کړی دی.
وروسته له هغه چې اشرف غني د غني خان د مزار جوړولو وړاندیز وکړ، پښتونخوا کې مېشت افغان جنرل قونسل نجیب احمدزی چارسدې سیمې ته تللی او هلته یې د فلسفي شاعر غني خان په قبر د ګلونو ګېډۍ ایښې ده.
افغان جنرل قونسل نجیب احمدزي د خدایي خدمتګار پاچاخان بنیاد له مسوولینو سره د افغان ولسمشر د هغه وړاندیز په اړه خبرې کړي چې له مخې یې په کوزه پښتونخوا کې د شاعر او سیاستوال غني خان قبر، موزیم او یاهم کتابخانه جوړېږي.
د پاچا خان بنیاد مسوولینو ژمنه کړې چې ډیر ژر به د افغان جمهور رئیس د وړاندیز مطابق نوموړي ته خپل لیکلی پلان وسپاري.