تاند ( جمعه، د حوت ۲۹) د افغانستان او زمبابوې کرکټ ملي لوبډلو ترمنځ د ۳ شل اوریزه لوبو لوبلړۍ دوهمه لوبه نن ۲ نیمې بجې ترسره کېږي.
له دې وړاندې لومړۍ لوبه افغان لوبډلې ګټلې وه.
په لومړۍ لوبه کې زمبابوې پچه وګټله او افغانستان ته یې د توپ وهنې بلنه ورکړه.
افغانستان په ټاکلو ٢٠ اورونو کې د ٥ لوبغاړو په سوځېدو ١٩٨ منډې وکړې، چې له ډلې يې رحمن الله ګربز ٨٧، اصغر افغان ٥٥ او کريم جنت ٢٦ منډې وکړې.
د زمبابوې لپاره ريچارډ نګاروا او بيليسنګ موزربارني ٢-٢ او ريان برل ١ ويکټ ترلاسه کړې.
زمبابوې لوبډلې په ټاکلو ٢٠ اورونو کې د ٧ لوبغاړو په سوځېدو ١٥٠ منډې وکړې او د ٤٨ منډو په توپير يې په لوبه کې ماتې وخوړه.
د دوى له خوا تيناشي کمونهوکامي ٤٤، سين ويليمس ٢٢، سکندر رضا ٢٢ او تاريساى مسکندا ١٨ منډې وکړې.
د افغانستان له خوا راشد خان ښه توپ اچونه ترسره کړه چې ٣ لوبغاړي يې وسوځول، همدا راز کريم جنت او فريد احمد هم ٢-٢ لوبغاړي وسوځول.