تاند (سه شنبه د حوت ۲۶) په کراچۍ کې د پاکستان پر رینجرز ځواک موټرسیکل بم چاودنې ۱۵ تنو ته مرګ ژوبله اړولې ده.
د کراچۍ پولیسو ویلي چې دا پېښه دوشنبه ماښام په اورنګي ټاون کې هغه مهال رامنځته شوه چې د رېنجرز ځواک پوځي موټر له دې سیمې څخه د تېرېدو په حال کې وو.
د کراچۍ د پولیسو مشرې (اېس اېس پي) سهايي عزيز په وینا، چاودېدونکي مواد په یوه موټرسايکل کې ځای پرځای شوي وو او چاودنه ورته ورکړل شوې ده.
د ورکړل شویو معلوماتو له مخې په دې چاودنه کې یو رېنجرز وژل شوی، دوه رینجرز، دوه پولیس او نور عام خلک ټپیان شوي دي.
پاکستاني پوليسو ددې پېښې د څېړنې خبر ورکړی دی.
په ورته مهال د بلوچ ليبرېشن ارمي په نامه د بلوڅو وسله واله ډله وايي، نفرو يې د پاکستان د سند ايالت په کراچۍ ښار کې د پاکستان د رنجرز عسکرو پر موټر چاودنه کړې، يو يې وژلی او لس يې مرګوني ژوبل کړي دي.
د دغې ډلې وياند جييند بلوڅ ويلي دي چې ملګرو يې دغه چاودنه د کراچۍ په اورنګي ټاون سيمه کې کړې ده.
نوموړي زیاته کړې، پاکستانيان دې وپوهېږي چې اوس ورڅخه نه يوازې په بلوچستان، بلکې د پاکستان په هېڅ ښار کې نه شي خلاصېدای.
د جییند په خبره، تر څو چې بلوچستان ازاد شوی نه وي، همداسې حملې او بريدونه به دوام کوي.