تاند (یکشنبه د حوت ۲۴) د زندانونو د تنظیم اداره تاییدوي چې د څرخي پله زندان کې د زندانیانو تر منځ نښته شوې او پنځه کسانو ته په کې مرګ ژوبله اوښتې.
د یادې ادارې د معلوماتو له مخې دغه نښته پرون ماښام مهال د زندان د اووم او اتم بلاکونو د زندانیانو ترمنځ شوې ده.
د زندانونو د تنظیم ادارې ویاند فرهاد بایاني ویلي، په دغه نښته کې یو تن وژل شوی او څلور نور ټپیان دي، چې ټپیان د درملنې لپاره روغتون ته لېږدول شوي دي.
نوموړي زیاته کړې چې نښته وروسته د امنیتي ځواکونو په مداخلې سره پای ته رسېدلې او اوسمهال وضعیت کنټرول دی.
د فرهاد بایاني په خبره چې ددې پېښې په هکله څېړنې پیل شوي.