تاند (جمعه د حوت ۱۵) جرمني وایي، نړیواله ټولنه باید له افغانستان څخه په بېړه د بهرنیو سرتېرو د وتلو مخه ونیسي.
دغه څرګندونې د جرمني د بهرنیو چارو وزیر هایکو ماس پرون پنجشنبه د دغه هیواد په پارلمان کې وکړې.
ماس وویل چې په افغانستان کې د بهرنیو ځواکونو ماموریت باید په مسؤلانه توګه پای ته ورسول شي او له دغه هیواده په بېړه د سرتیرو اېستل کېدای شي د طالبانو په ګټه تمام شي.
نوموړي د افغان حکومت او طالبانو تر منځ اوسني مذاکرات په دغه هیواد کې د سولې ټینګښت لپاره وروستی چانس وباله او زیاته یې کړه چې دغه فرصت باید ضایع نه شي.
د جرمني د بهرنیو چارو وزیر وویل، په افغانستان کې د نړیوالو سرتېرو حضور د فشار یو تر ټولو مهمه وسیله ده چې په وینا طالبان له نړیوال فشار پرته د یو سیاسي هواري لپاره د جګړې پای ته رسېدو ته حاضر نه شي.
هایکو ماس وویل چې له افغانستان څخه د بهرنیو سرتېرو وتل به د دې لامل شي چې طالبان د سولې خبرو پر ځای جګړې ته دوام ورکړي.
د جرمني کابینې تېره اونۍ په افغانستان کې د خپلو سرتیرو حضور د ۲۰۲۲ کال د جنورۍ تر ۳۱ وغځاوه.
د معلوماتو پر اساس جرمني اوسمهال په افغانستان کې ۱۱۰۰ تنه سرتیري لري.