تاند ( سې شنبه، د کب ۱۲) راپورونه وایي، افغان ولسمشر محمد اشرف غني د هېواد د لوی څارنوال فريد حميدي استعفاء منلې ده.
فرید حمیدي په ۱۳۹۵ لمریز کال کې له ولسي جرګې د باور رایه واخیسته او د افغانستان د لوی څارنوال په توګه وګومارل شو.
نوموړي له شاوخوا پنځه کلونو دندې وروسته تېره ورځ خپل استعفا لیک ولسمشر غني ته ولېږه او ولسمشر یې هم استعفاء منلې ده.
د ولسمشر مرستیال ویاند دوا خان مینه پال وایي، د لوی څارنوال فرید حمیدي استعفاء د ولسمشر له لوري منل شوې ده.
د مینه پال په وینا، ښاغلي حیمدي د شخصي او کورنیو ستونزو له امله استعفاء وړاندې کړې ده.
نوموړي دغه راز زیاته کړې چې ولسمشر د ښاغلي حمیدي دخدمتونو د درناوي ترڅنګ د هغه استعفاء ومنله.
د لوی څارنوال فرید حمیدي استعفاء داسې مهال ده چې دې وروستیو کې د افغانستان لویې څارنوالۍ له لوري یو شمېر لوړ پوړي چارواکي د فساد په تور په نغدي جرېمو او بند محکوم شول او دا چاره خلکو له هرکلي سربېره؛ فساد سره د مبارزې برخه کې د افغان حکومت لاسته راوړنه بلل شوې ده.