تاند ( دوشنبه، د حوت ۱۱) د پاکستان په سوپر ليګ په یوولسمه لوبه کې محمدنبي چټکه پنځوسيزه يې ووهله خو لوبډله یې بریالۍ نه شوه.
هغه د خپلې لوبډلې لپاره په ۳۵ توپونو چټکې ٥٧ منډې جوړې کړې چې ۳ شپږیزې او ۴ څلوریزې په کې شاملې وې.
دا لوبه چې د کراچۍ کنګز او لاهور قلندرز لوبډلو ترمنځ ترسره شوه د کراچۍ کنګز لوبډلې لومړی توپ وهنه وکړه اوټاکلو ۲۰ اورونو کې یې د ۹ لوبغاړو په زیان ۱۸۶ منډې جوړې او مقابلې لوبډلې ته یې د ۱۸۷ منډو هدف وټاکه.
د لاهور قلندرز له خوا شاهين شاه افريدي ښه توپ اچونه ترسره او ٣ لوبغاړي يې وسوځول.
لاهور قلندرز لوبډلې که څه هم پيل کمزوری وو خو د ډنک او فخرزمان ملګرتیا یاده لوبډله بریالۍ کړه.
لاهور قلندرز لوبډلې ټاکل شوی هدف په ۲۰ ام اور کې د ۴ لوبغاړو په زیان پوره او لوبه یې وګټله.
فخرزمان ۸۶ او ډنګ بیا د خپلې لوبډلې لپاره ۵۷ منډې جوړې کړې.
د لوبې غوره لوبغاړی شاهین افریدی ونومول شو.