تاند ( پنجشنبه، د کب ۷) د افغانستان د مخابراتو او معلوماتي ټکنالوژۍ وزارت چارواکي وایي، په ۱۳۹۹ مالي کال کې د افغان ټیليکام مخابراتي شرکت ۴۰ ولسوالۍ، څه باندې ۴۵۰ ښوونځي، ۲۱پوستهخانې او ۵۴ ادارې د نوري فایبر له ملي شبکې سره نښلولي دي.
د دې وزارت چارواکي که څه هم دې برخه کې د لاسته راوړنو خبر ورکوي؛ خو وایي لا هم د امنیتي ستونزو او سختې جغرافیې له امله د هېواد نهه۹ولایتونه له نوري فایبر سره نه دي نښول شوي.
دوی وایي، له نوري فایبر سره د یادو ولایتونو د نښلولو چارې یې چټکې کړي او د دې شمېر ولایتونو جغرافیي مطالعات یې هم پیل کړي دي.
د افغانستان د مخابراتو او معلوماتي ټکنالوژۍ وزیرې معصومه خاوري ملت د حساب ورکولو په پروګرام کې دغه راز وویل چې د هېواد د نوري فایبر ملي شبکه اوسمهال د پنځه هېوادونو سره نښلول شوې ده.
د نوموړې په وینا، د افغانستان نوري فابیر شبکه اوس مهال د پاکستان، ایران، ترکمنستان، قزاقستان، ترکمنستان او تاجکستان د نوري فایبر له شبکو سره نښلول شوې او د دغو هېوادونو له نوري فایبر شبکې سره له نښلېدو وروسته د یادو هېوادونو ترمنځ د معلوماتو د تبادلې زمینه هم برابره شوې ده.
د افغانستان د مخابراتو وزارت د شمېرو په اساس د نوري فایبر شبکې د پروژې د تطبیق لپاره د ۱۵۰ میلیون ډالرو پانګونه شوې چې ۶۰ میلیونه یې افغان حکومت او پاتې برخه یې د امریکا د متحده ایالاتو پراختیايي ادارې ورکړي دي.
د افغانستان د مخابراتو وزیرې دغه راز وویل چې په هېواد کې د شپږ زره کیلومتره نوري فایبر شبکې د غځولو پلان ترتیب شوی او په ۲۸ ولایتونو کې د ۵۵۰۰ کیلیومتره شبکې د غځولو کار بشپړ شوی دی.
د افغان حکومت د معلوماتو له مخې، دا مهال په افغانستان کې شاوخوا لس میلیونه وګړي انټرنټ ته لاسرسی لري خو اکثره خلک د انټرنیټ له ټیټ کیفیت او لوړو بیو شکایتونه کوي چې لا هم حکومت دې برخه کې کوم اقدام ندی تر سره کړی.