تاند(چهارشنبه، د حوت ۶) وسله والو طالبانو یو ځل بیا ویلي چې، د بهرنیو ځواکونو د حضور دوام به په افغانستان کې د جګړو او ستونزو د دوام سبب شي.
د طالبانو د قطر دفتر ویاند نعیم له نیوز ویک سره په خبرو کې ویلي، د بایډن ادارې ته په کار ده چې د دوحې پر هوکړه عمل وکړي او خپل سرتېري له افغانستان وباسي.
نوموړي خبرداری ورکړی چې که امریکا خپل سرتېري تر مې میاشتې پورې له افغانستان و نه باسي، ښایي دا کار د بین الافغاني مذاکراتو پروسه زیانمنه کړي.
نوموړي همدا راز ټینګار کړی چې، طالبان هوکړې ته ژمن دي، خو امریکا پر ژمنو عمل نه دی کړی.
وسله وال طالبان داسې مهال دغه څرګندونې کوي چې امریکا بیا دوی د ژمنو پر نه عملي کولو او دغه راز د جګړې د نه کمولو له امله ملامت بولي او ټینګار کوي چې له همدې امله به د سولې پر هوکړه بیا کتنه کېږي.
په ورته مهال امریکايي چارواکي وایي چې د هرکړې پر بیا کتنه کې له افغان حکومت سره اړیکه کې دي.