تاند (دوشنبه د حوت ۴) د بدخشان ځايي چارواکي وايي چې ددغه ولایت په راغستان ولسوالۍ کې د سرو زرو د کان د سپړلو پر مهال څلور کان کیندونکي مړه شوي او درې نور ټپیان دي.
د بدخشان د امنیه قومندانۍ ویاند ثناءالله روحاني وايي، دا پېښه پرون یکشنبې د واورې او باران د ورښت له امله رامنځته شوې ده.
د ښاغلي روحاني په خبره، د ورښتونو له امله د کان یوه برخه غورځېدلې او کان کیندونکو ته یې مرګ ژوبله اړولې ده.
نوموړی زیاتوي، د راغستان ولسوالۍ امنیتي منسوبینو د پېښې ټپیان د سیمې روغتیايي مرکز ته بېولي او د مړو شویو کسانو جسدونه یې د هغوی کورنیو ته سپارلي دي.
د بدخشان د امنیه قومندان د ویاند په وینا چې د افغان حکومت له خوا د غیر قانوني کان کیندنې د مخنیوي له امله د راغستان په هغو سیمو کې د سروزرو د کان کیندنې کېږي چې د طالبانو تر ولکې لاندې دي.
د راغستان ولسوالۍ د بدخشان له ناامنو سیمو څخه ده چې خلک په کې د سرو زرو د استخراج لپاره خپلسرې کیندنې کوي.