تاند ( دوشنبه، د حوت ۴) د ولسي جرګې رییس میر رحمن رحماني وایي د امنیتي ادارو مسوولان باید د وروستیو پېښو په اړه د وضاحت لپاره دغه جرګې ته ورشي.
رحماني د ولسي جرګې د نننۍ غونډې په امتیازي ساعت کې د خبرو پر مهال په کابل کې د تېرې ورځې چاودنه بوږنوونکې وبلله او پر حکومت یې غږ وکړ چې ژر د شته ګواښونو د ختمولو لپاره ګامونه پورته کړي.
نوموړي همدا راز د ولسي جرګې امنیتي او دفاعي کمیسیون ته دنده وسپارله چې، د امنیتي ادارو مسوولان او د کورنیو چارو وزارت چارواکي دغه کمیسیون ته راوغواړي او د وروستیو نا امنیو په اړه وضاحت ترې وغواړي.
د یادونې ده چې تېره ورځ مازیګر د کابل ښار د څلورمې ناحیې اړوند برکي څلورلاري ته نږدې یوه چاودنه وشوه چې د وروستیو معلوماتو له مخې څلور کسه یې ووژل او شپږ نور یې ټپیان کړل.
د دې پېښې انځورونه او ویډیوګانې خورا بوږنوونکي وو چې په ټولنیزو رسنیو کې یې هم سخت غبرګونونه پارولي دي.