تاند ( یک شنبه، د حوت ۳) راشد خان په پي اېس اېل لیګ کې د ښې توپ اچونې ترڅنګ ښه توپوهنه هم ترسره کړه او لاهور قلندرز لوبډله یې بریالۍ کړه.
یاده لوبه د روانو لوبو په لړ کې دویمه لوبه وه چې د لاهور قلندرز او پېښور زلمي لوبډلو ترمنځ ترسره شوه.
لاهور قلندرز پچه وګټله او پېښور زلمي ته يې د توپوهنې بلنه ورکړه.
پېښور زلمي په ټاکلو ۲۰ اورونو کې د ۶ لوبغاړو په سوځېدو ۱۴۰ منډې وکړې.
د لاهور قلندرز له لوري شاهین شاه افریدي ۳ او سلمان مرزا ۲ ویکټې واخیستې.
خو راشد خان هم ښه توپ اچونه ترسره کړه چې په ۴ اورونو کې يې ۱۴ منډې ورکړې.
لاهور قلندرز لوبډلې په ۱۸.۳ اورونو کې د ۶ لوبغاړو په سوځېدو ټاکل شوی هدف پوره او لوبه یې په خپل نوم کړه.
د دوی له لوري محمد حفیظ ۳۳ او راشد خان ۲۷ چټکې ناسوځېدلې منډې وکړې.
د پېښور زلمي له لوري وهاب ریاض او ثاقب محمود ۲-۲ او مجیب الرحمن هم ۱ وېکټ واخیسته.
