تاند(یکشنبه، د حوت ۳) د ملي امنیت عمومي ریاست د حقاني شبکې او داعش ډلې ۵ غړي نیولي دي.
د ملي امنیت څخه په خپره شوې خبرپاڼه کې راغلي، امنیتي ځواکونو د یادې ډلې هغه غړي نیولي، چې د کابل ښار په مختلفو سیمو یې د راکټي بریدونو د تنظیم، د راکټونو د انتقال او ځای پر ځای کولو دنده لرله.
خبرپاڼې زیاته کړې، چې یاد کسان جاوید، روح الله، احمد مرید، حفیظ الله او عبدالجبار نومیږي، چې د کابل ښار په ۱۷ امنیتي حوزه کې نیول شوي دي.
یاد ریاست ډاډ ورکړی چې د خپلو هېوادوالو د امنیت د خوندیتوب لپاره شپه او ورځ هڅه کوي تر څو د هدفي وژنو ګراف راښکته کړي.
ملي امنیت داسې مهال د یادو کسانو د نیول کېدو خبره کوي چې په دې وروستیو کې د کابل ښار کې تاوتریخوالي او هدفي وژنو زور اخیستی او هره ورځ ډېری کسان پکې خپل ژوند له لاسه ورکوي.
که دا کسان تورن وختل باید ژر تر ژره اعدام شي. کنه سبا به بیا لکه دا نور ترهګر د تبادلې په نامه خوشې شي او بیا به لسګونو کورنی د غم په ټغر کېنوي. طالب خو هسې هم په نه په ملکي افغانانو او نه په دولتي کارکوونکو رحم لري. نو انتظار د څه لپاره.