تاند(یکشنبه، د حوت ۳) امریکا کې له بوئينګ الوتکې څخه په هوا کې د ماشین پُرزې غورځیدلې دي.
د بوئینګ ۷۷۷ مسافر وړونکې الوتکې ماشین وروسته له هغې اور واخیست، چې د امریکا د کولورادو ایالت د ډینور له هوايي ډګر څخه پورته شوه او د ماشین یو شمېر پُرزې یې په یوه استوګنیزه سیمه کې د خلکو پر کورونو راوغورځېدې.
په دغه الوتکه کې ۲۳۱ مسافر او ۱۰ تنه د الوتکې خدماتي کسان سپاره وو، چې له کومې ستونزې پرته یې بیرته په هماغه هوايي ډګر کې ناسته وکړه او هیڅ چاته پکې زیان نه دی اوښتی.
د کولورادو ایالات د برومفیلډ ښار اوسیدونکو د الوتکې د ماشین د غورځېدلو برخو او پورزو عکسونه په ټولنیزو رسنیو کې خپاره کړي دي، چې د ډیرو لپاره په زړه پورې وو.
د فدرال هوایي شرکت اداره (FAA) ویلي، د الوتکې د ښې اړخ ماشین له الوتنې څخه ۳۲۸ دقیقې وروسته ستونزه پیدا کړې وه.
د برومفیلډ ښار پولیسو د سیمې له خلکو غوښتنه کړې، چې د یادې الوتکې د ماشین پُرزې دې نه راټولوي.
په رسنیو کې په خپرو شوو تصویرونو کې لیدل کیږي، چې په یاده پېښه کې یو موټر او د یو کور چت ته زیان رسیدلی دی.