تاند (جمعه د حوت ۱) د ملي روغې جوړې عالي شورا وایي د افغانستان اوسني وضعیت او د سیمه ییزې او نړیوالې ترهګرۍ د فعال حضور له امله شته ننګونو ته په پام سره د بهرنیو ځواکونو د وتلو لپاره لازم شرایط کیدای شي د دواړو لوریو د خبرو او تلپاتې سولې ته د رسېدو په پایله کې رامنځ ته شي.
د ملي روغې جوړې عالي شورا له لوري په خپره شوې خبرپاڼه کې راغلي چې ددې شورا مشر عبدالله عبدالله د ناټو د غړیو هېوادونو د دفاع وزیرانو له وروستۍ پرېکړې چې د سولې له بهیر، بین الافغاني خبرو، د تاوتریخوالي پای ته رسولو، د خبرو مېز ته له راګرځېدو څخه یې غوڅ ملاتړ ښودلی او د افغان امنیتي او دفاعي ځواکونو ملاتړ ته دوام ورکوي هرکلی کړی دی.
د ناټو د غړیو هېوادونو د دفاع وزیرانو آنلاین دوه ورځینۍ غونډه د پنجشنبې په ورځ پای ته ورسېده.
که څه هم په دې ناسته کې په افغانستان کې د ناټو ځواکونو د راتلونکي حضور په هکله پریکړه ونه شوه، خو د ناټو عمومي منشي ینس ستولتنبرګ ویلي چې د ترهګرۍ پر وړاندې مبارزه کې د افغان امنیتي او دفاعي ځواکونو ملاتړ ته دوام ورکوي.
د سټولټنبرګ په خبره، ناټو سازمان په پرېکنده ډول د افغانستان د سولې له بهیر څخه ملاتړ کوي او په دغه هېواد کې یې شتون هم د سولې بهیر د یوې برخې په توګه تنظیم کړی دی.
په ورته مهال طالبان وايي که مقابل لوری د ناکامه تجربو د تکرار هڅه وکړي، د هر راز بشري ناورین مسؤلیت به د امریکا پر غاړه وي.
طالبانو پر خپله ویب پاڼه لیکلي چې د دوحې د تړون عملي کول هم دامریکا او ناټو په ګټه دی او هم د افغانستان.
دوی وايي، که مقابل لوری د تېرو ناکامه تجربو د تکرار هڅه وکړي، په راتلونکي کې به د هر راز احتمالي جګړې او بشري ناورین مسؤلیت د امریکا پر غاړه وي.