تاند (چهارشنبه د دلوې ۲۹) امنیتي سرچینې تاییدوي چې د ملي دفاع وزارت او د ملي امنیت ریاست دوه افسران چې پلار او زوی دي په کابل کې په یوه وسله وال برید کې وژل شوي.
ډګروال عبدالقیوم ځاځی د ملي دفاع وزارت د اوپراسیون امر او زوی یې فهیم د ملي امنیت ریاست افسر و.
د کابل امنیه قومندانۍ د معلوماتو له مخې، ډګروال عبدالقیوم ځاځی او زوی یې فهیم نن سهار شاوخوا ۷:۳۰ بجې د کابل د بګرامیو ولسوالۍ په حسین خېلو سیمه کې وژل شوي.
سرچینه زیاتوي، دغه افسران دندې ته پر لاره و چې په یاده سیمه کې د وسله والو طالبانو له خوا په ډزو وژل شوي دي.
طالبانو تر اوسه په دې هکله څه نه دي ویلي.