تاند (دوشنبه د دلوې ۲۷) د ملي امنیت ځانګړیو ځواکونو د ننګرهار ولایت په مرکز جلال اباد ښار کې د داعش ډلې د انتحاري په ګډون د رهبرۍ ۷ غړي وژلي.
د ملي امنیت ۰۲ قعطې نن دوشنبه د یوې خبرپاڼې په خپرولو سره ویلي، تېره شپه ځانګړو ځواکونو د جلال اباد ښار ۷ ناحیې اړوند غوچکو ساحه کې ځانګړي شپني عملیات ترسره کړل چې په ترڅ کې یې د داعش ډلې د انتحاري په ګډون د رهبرۍ ۷ غړي د مقاومت په جریان کې ووژل شول.
په خبرپاڼه کې راغلي، وژل شویو کسانو په جلال اباد ښار کې په دولتي ارګانونو د ځانمرګو او ډله یيزو بریدونو پلان درلود چې هدف ته تر رسیدو مخکې په نښه او له منځه یووړل شول.
ملي امنیت وايي، ددې عملیاتو پر مهال یوه انداې وسلې او مهمات هم له منځه وړل شوي او عامو خلکو ته په کې زیان نه دی رسېدلي.
داعش ډلې تر اوسه په دې هکله څه نه دي ویلي.
په جلال اباد کې د درنو ډزو غږونه اورېدل کیږي، پوځي عملیات روان دي