تاند (یکشنبه د دلوې ۲۶) د طالبانو مشر ملا هیبت الله اخوندزاده، ددې ډلې د استخباراتو رئیس ملا مطیع الله او د مالي چارو رئیس حافظ عبدالمجید په کوېټه کې په یوه چاودنه کې وژل شوي دي.
دغه چاودنه څو میاشتې وړاندې د کویټې په چلو باوري سیمه کې د حافظ عبدالمجید په کور کې شوې.
د هشت صبح ورځپاڼې د راپور له مخې چې نن یکشنبه د دلوې په ۲۶مه خپور شوی په کې راغلي، ملا هیبت الله او ددې ډلې د استخاراتو رئیس د چاودنې په لومړيو شېبو کې وژل شوي و او د طالبانو د مالي چارو رئیس حافظ عبدالمجید دوه، درې ورځې وروسته د پاکستان په یوه پوځي روغتون کې ساه ورکړه.
طالبانو تر اوسه په رسمي توګه په دې هکله څه نه دي ویلي.
تر دې وړاندې هم د ملا هیبت الله د وژل کېدو راپورونه ورکړل شوي و.
سرچینه وايي، په ۱۳۹۸ د اسد په ۲۵مه داسې راپورونه خپاره شول چې ملا هیبت الله په کوېټه کې په یوه چاودنه کې وژل شوی دی.
هشت صبح د روېټرز په حواله ویلي چې په یاده چاودنه کې د ملا هبت الله ورور وژل شوی او زوی یې ټپي شوی دی.
بله خوا داسې ویل کېده چې د طالبانو مشر ملا هبت الله اخوند زاده د چاودنې په وخت کې په جومات کې نه و.
د پاکستان په پوځ کې ځینو سرچینو بیا ویلي چې په یاده چاودنه کې د ملا امام په ګډون دوه تنه وژل شوي او ۲۵ نور ټپیان و.
بله خوا بیا په دې پېښه کې د څلورو کسانو د وژل کېدو راپورونه ورکړل شوي دي.
د روان کال د حمل په ۲۰مه هم په کوېټه کې د حافظ عبدالمجید په کور کې د چاودنې خبرونه خپاره شول. د پاکستاني رسنیو د راپورونو له مخې ددې برید موخه طالب مشران او قومندانان و.
که څه هم ځايي سرچینو په دې چاودنه کې د طالبانو د یو شمېر مشرانو د وژل کېدو خبر ورکړ خو دې ډلې تر اوسه په دې هکله څه نه دي ویلي.
فارین پالیسي بیا د روان کال په جوزا میاشت کې د یوه راپور په خپرولو سره وویل چې د طالبانو مشر په کورونا د اخته کېدو له کبله مړ شوی دی.
که څه هم د دې ډلې یوه قوماندان مولوي محمد علي احمدجان هغه مهال په کورونا ناروغۍ د ملا هیبت الله اخته کېدل تایید کړل، خو په خبره یې چې صحت یې په ښه کېدو دی.
د طالبانو د نظامي چارو ویاند ذبیح الله مجاهد بیا په کورونا د خپل مشر د اخته کېدو راپورونه بې بنسټه وبلل او ویې ویل: «ټول مسؤلان روغ او جوړ او په خپلو چارو بوخت دي.»
ملاهیبت الله اخوندزاده چې اصلي د کندهار اوسېدونکی و په ۱۳۹۵ کال کې د ملا اختر محمد منصور پر ځای د طالبانو د مشر په توګه وټاکل شو.
د راپورونو له مخې ملا اختر محمد منصور په همدې کال پاکستان کې د یوه هوايي برید پر مهال ووژل شو.
داهسې مستعار نومونه دي ، په اصل کې کرنیل امام ملا مااومر وو ، ملا اختر به د جنرال حمید ګل په شان د آی اس آی کوم قوماندان وو، ملاهبو به هم د پنجابیانو د پوځ کوم جرنیل ، مرنیل یا کرنیل وي .