تاند ( یکشنبه، د دلوې ۲۶ ) افغان ولسمشر اشرف غني وایي، په هېواد کې د جګړې د پای ته رسېدو او سولې ته د رسیدو وخت راغلی او مونږ به تلپاتې سولې ته رسیږو.
ولسمشر اشرف غني دا څرګندونې نن له افغانستان څخه د شوروي ځواکونو د وتلو د ۳۲ کلیزې په مناسبت په یوه ټلویزیوني پیغام کې کړي دي.
د ولسمشر غني په وینا، زمونږ د خلکو موخه له جهاده دا وه، چې په افغانستان کې د شوروي ځواکونو له وتلو وروسته د خلکو د خوښې نظام رامنځته، پوځي او ملکي بنسټونه پیاوړي او وساتل شي.
د نوموړي په باور د شوروي سرتېرو وتل له افغانستان مسوولانه نه ول نو ځکه په هېواد کې خپل منځي جګړې رامنځ ته شوې.
هغه زیاته کړې: د شوروي ځواکونو وتل له افغانستانه مسوولانه نه ول او د هېواد راتلونکي ته هم کوم تدبیر نه و نیول شوی؛ نو افغانستان په څو اړخیزه کورنۍ جګړه کې ښکېل شو، چې په پایله کې یې د امنیتي ځواکونو، ملي بنسټونو او د افغانستان بېخبنا له منځه ولاړه.
ولسمشر په ډاګه کړې چې په هېواد کې د جګړې د پای ته رسېدو او سولې ته د رسیدو وخت راغلی او مونږ به تلپاتې سولې ته رسیږو.
سولې ته د رسیدو په برخه کې د ولسمشر دا پیغام داسې مهال دی چې دې وروستیو کې په هېواد کې جګړو زور اخیستی او تر بل هر وخت حالت نازک انګیرل کیږي.
باید وویل شي چې نن د سلواغې ۲۶مه له افغانستانه د شوروي اتحاد د وتلو له ورځې سمون خوري؛ یعنې ۳۲ کاله وړاندې په ۱۳۶۷ لمریز کال د پخواني شوروي پوځ د ماتې له امله د افغانانو لپاره دغه ورځ د ویاړونو ډکه ورځ بلل شوې ده.