تاند ( شنبه، د دلوې ۲۵) د ملي امنیت شورا سلاکار حمدالله محب وایي وسله وال طالب له سولې سره علاقه مندي نه لري او ټول پام یې جګړې ته اړولی دی.
هغه وايي د حکومت مرکچي پلاوی لاهم دوحه کې دی او د سولې خبرو لپاره پوره چمتووالی لري.
حمدالله محب نن د یوه خبري کنفرانس پرمهال زیاته کړه طالبان د دې لپاره چې اوربند او سوله وکړي برعکس راتلونکي کال لپاره جګړې ته په چمتووالي بوخت دي.
نوموړی دغه راز زیاتوي چې: « طالبان مطلق واک غواړي او د طالبانو باداران د افغانستان ویجاړول غواړي، که ډاډ ترلاسه شي چې طالبان واقعي سوله غواړي، چمتو یو چې قرباني ورکړو».
دا په داسې حال کې ده چې د امریکايي پوځي او د امریکا د استخباراتي ادارې پخواني مشر ډیویډ پېټریس هم په افغانستان کې اوسنی وضعیت د جدي اندېښنې وړ بللی دی او په دې باور دی چې طالبان د سولې په برخه کې ناغېړي کوي.
هغه ویلي چې طالبانو د تاوتریخوالی د کمولو لپاره نه بلکې د خپلو زندانیانو د خوشي کولو او همدا راز له افغانستان د امریکایي ځواکونو د وتلو لپاره هوکړه لاسلیک کړې ده.