تاند(شنبه، د دلوې ۲۵) د افغانستان د مالیې وزارت وایي، نړیوال بانک له افغانستان سره د کورونا واکسین د تمویل په برخه کې ۱۱۳ میلیونه ډالره مرسته کوي.
د مالیې له وزارت په خپره شوې خبرپاڼه کې راغلي، د ماليې وزارت مالي مرستيال ښاغلي عبدالحبيب ځدران د عامې روغتيا وزارت، نړيوال بانک او د اسيا پراختيايې بانک له استازو سره وکتل.
خبرپاڼه لیکي، په دې ناسته کې د افغانستان لپاره د کورونا واکسين په تمويل، په دې برخه کې د مرستو د اغيزمن لګښت او له مرسته کيدونکو تجهيزاتو څخه د ښې ګټې اخيستنې لپاره په پلان جوړولو او يو شمير نورو اړوندو مسايلو په ټراو بحث او نظرونو تبادله شوه.
د خبرپاڼې له مخې، ټاکل شوى ده چې په افغانستان کې د کورونا واکسين د تمويل په موخه نړيوال بانک ١١٣ ميليونه امريکايې ډالر او د اسيا پراختيایې بانک ٥٠ ميليونه امرکايې ډالره مرسته وکړي.
د یاد وزارت په خبره په دې ناسته کې د نړيوال بانک له لوري د ١١٣ ميليونه ډالرو د کيدونکې مرستې هوکړه نهايې او ټاکل شوې ده چې په نږدې راتلوونکې کې لاسليک شي.
دا په داسې حال کې دی چی نړیوال بانک تردې وړاندې هم له افغانستان سره د بیارغونې او له کورونا ویروس سره د مبارزې په برخه کې مرستې کړي ده.