تاند(شنبه، د دلوې ۲۵) د ناټو ځواکونو یو تن پخواني امریکایي قومندان جنرال جیمس سټارویډس ویلي چې په افغانستان کې د امریکایي سرتېرو ساتل د امریکا له امنیت سره د پام وړ مرسته کوي.
سټارویډس زیاته کړې امریکا باید له افغانستان څخه د خپلو ځواکونو وتلو برخه کې له خپلو متحدینو ځانګړې توګه د ناټو له رهبرۍ سره مشوره وکړي او د هغو په خوښه په دغه هېواد کې د خپلو سرتېرو حضور تنظیم کړي.
نوموړی همدا راز زیاتوي، امریکا باید تېر ته په کتو داسې پرېکړه ونه کړي چې بیا بېرته راتګ ته مجبوره شي.
د هغه په وینا، امریکا ته په کار ده چې شرایطو ته په کتو او د دې تضمین په ترلاسه کولو سره خپل سرتېري له افغانستان څخه وباسي چې دا هېواد به بېرته د ترهګرو پر خوندي ځاله او نړۍ ته په یو سرخوږي نه بدلېږي.
هغه ټینګار کړی دی چې که چېرته امریکا د سپټمبر میاشتې د یوولسمې تکرار نه غواړي نو تر یو مناسب فرصت پورې دې خپل سرتېري افغانستان کې وساتي.
دا خبرې داسې مهال کېږي چې اوس تازه د امریکا نظامي او اطلاعاتي چارواکو ویلي چې د داعش ډله هم پراخو بریدونو ته د چمتوالي په حال کې ده.
د داعش خراسان ډله چې تر ډیره یې فعالیتونه د افغانستان مربوط کېږي تېر کال یې د انزوا راپورنه ورکړل شوي وو اوس بېرته د رشد په حال کې ده.
امریکایي چارواکي وایي، دغې ډلې تېر کال په ننګرهار او کونړ کې تر پراخو فشارونو لاندې د جګړې وړتیا له لاسه ورکړه او تر نیمایي ډېر وسله وال یې ووژل شول خو اوس بېرته د راپورته کېدو په حال کې ده.
د امریکایي چارواکو په خبره، د داعش ډلې په اړه تازه اطلاعات دا دي چې د دغې ډلې د وسله والو شمېر ۱۰۰۰ کسانو ته راټیټ شوی، له همدې امله یې جګړې کمې کړې خو ښایي یو ځل بیا خپلو بریدونو ته زور ورکړي.