تاند (جمعه د دلوې ۲۴) په سياسي او امنيتي چارو کې د ولسمشر اشرف غني سلاکار وايي چې دولت بايد اوس وخت کې هم د سولې او هم د جګړې لپاره تیاری ولري؛ هغه تجربې چې د ډاکټر نجيب الله او طالبانو حکومت وروسته رامنځ ته شوې وې، بايد تکرار نه شي.
محمد محقق دغه څرګندونې نن جمعه د لویې جرګې په تالار کې د خپل زوی محمد باقر محقق د مړینې په لومړي تلین غوڼده کې وکړې. هغه د موقت حکومت له جوړېدو سره یې مخالفت څرګند کړ او له خلکو يې وغوښتل چې د اوسني نظام ملاتړ وکړي.
نوموړي وویل، په هېواد کې روان تاوتریخوالي ته په کتو د سولې خبرو ته خوشبین نه دی او زیاته یې کړه چې ښايي راتلونکی پسرلی په افغانستان کې د سختو جګړو شاهد وي.
هغه وویل، ده ته رسېدلي معلومات ښيي چې طالب قوماندانان د روزنې لپاره پاکستان ته استول شوي دي او د جګړو لپاره تیاری نیسي.
محمد محقق چې د ملي روغې جوړې عالي شورا د رهبرۍ غړی هم دی ټینګار وکړ چې له افغانستانه د امريکايي ځواکونو وتل بايد له ټولو سياسي اړخونو سره په هوکړې تر سره شي.
په دې ناسته کې د ولسمشر دويم مرستيال سرور دانش وویل چې طالبانو د سولې لپاره خپلې ژمنې نه دي پوره کړي، په داسې حال کې چې حکومت سولې ته د رسېدو لپاره طالب بنديان ازاد کړل او مرکچي پلاوی يې په دوحه کې د خبرو مېز ته حاضر دی خو طالبانو د مذاکراتو مېز پریښی.