تاند ( پنجشنبه، د دلوې ۲۳ ) د خوست ځايي چارواکي دې ولایت کې د ۲۴۲ پروژو چې ټول پرې ۷۵۹ میلیونه افغانۍ لګښت راغلی د بشپړېدو خبر ورکوي.
د دغه ولایت د رسنیو له دفتره په راغلې خبرپاڼه کې ویل شوي، په دې پروژو کې اسفالټ او کانګریټي سرکونه، زراعتي ځمکو کانالونه، پلونه، پلچکونه، کاریزونه، د اوبو زخیروي بندونه، سربندونه، لمریزه برېښنا، استنادي دیوالونه او د ښوونځیو ودانۍ شاملې دي.
خبرپاڼه وایي، په دې پروژو کې ۴۵ ښوونځیو ودانۍ، چې پرې ۲۰۲ ملیونه افغانۍ لګښت شوی او همداشان د ۷۵۹ ملیونو افغانیو په لګښت ۲۴۲ بېلابېلې پروژې شاملې دي، چې د پټۍ په پرې کولو سره رسما ولس ته د خدمت په موخه وړاندې شوې.
د خوست د ځایي چارواکو د معلوماتو له مخې، دا مهال د کلیو او پراختیا وزارت په چوکاټ کې ۳۳۸ پروژې د ۸۰۶ ملیونو افغانیو په لګښت یاد ولایت کې تر کار لاندې دي چې همدا ۷۶ زره وګړو ته په کې د کار زمینه برابره شوې ده.
دا په داسې حال کې ده چې دې ورځو کې په خوست ولایت کې د ځوانانو له لوري د نیالګیو د کینولو کمپاین هم روان دی او ګڼ ځوانان د ښار په بېلا بېلو سیمو کې د نیالګیو د نهال سربېره خلکو ته د هغې د ساتنې لارښوونې کوي.