تاند ( چهارشنبه، د دلوې ۲۲) د ولسي جرګې ځینو غړو د نننۍ غونډې په امتیازي ساعت کې په هېواد په تېره بیا په کابل کې وروستۍ امنیتي پېښې او هدفي بریدونه د جدي اندېښنې وړ بللي دي.
د ولسي جرګې غړو پر امنیتي ادارو په تېره د ولسمشر پر لومړي مرستیال نیوکه کړې چې د خلکو د امنیت په تامین کې ناکام دي.
د ولسي جرګې غړی خالد اسد د امتیازي ساعت په ناسته کې وویلې چې ناپېژانده وسله وال هره ورځ په کابل ښار کې بریدونه کوي او د ځوانانو ژوند اخلي خو حکومت نه بینا سترګې لري او نه هم اورېدونکي غوږونه.
نوموړي د ولسمشر له لومړي مرستیال وغوښتل چې ژر تر ژره دې د د ولس غږ واوري ا و امنیت دې تامین کړي.
نوموړی له حکومت نه غوښتنه کې چې د خلکو د امنیت د تامین په برخه کې دې بې پروايي نه کوي.
ولسي جرګه داسې مهال په هېواد کې د نا امنیو په مهار کې امنیتي مسوولان ناکام بولي چې تازه نن سهار د کابل ښار په چاودنه کې د کابل د پنځمې امنیتي حوزې امر وژل شوی دی.
په دې پېښه کې د هغه دوه ساتونکي هم وژل شوي.
تر اوسه کومې ډلې ددې پېښې مسوولیت نه دی منلی او نه هم امنیتي ادارو په دې اړه نور جزیات خپاره کړي دي.
خبرې کول او انتقاد کول خورا آسانه کار دی. د اشرافو د جرګې غړي لسګونه امنیتي پرسونل او هر ډول معاشونه او امتیازات لري . هغه متل دی دوی د مړې ګېدې پاړسو غږوي . دوی یوځل بیا غواړي د 1990 کلونو ملوک الطوایفي ، ګډوډي ، چور او چپاول تجربه کړي . ستاسو دا بې نظمي ، د دولت پرضد پروپاګند د حرکت محسني او حزب وحشت اسلامي تاریخي جنایتونو ته زمینه برابروي . بیا به د ژوندیو انسانانو په سرونو مېخونه ټکوهل کیږي . د ښځو تي به پرې کوي او رقص مرده ها او د شفیع دیوانه شکنجو ته به ګډیږي.
هغوی چې کار کوي باید وستایل شي، زمونږ امنیتي ارګانونه هره ورځ د وطن اوافغانانو د ژوند د ساتلو لپاره قرباني ورکوي . تاسو که رښتیا ملي روحیه لرئ ، د هغوی ترڅنګ ودرېږئ . افغانان ملي اتفاق او یوالي ته را وبولئ ، خپلو ملي امنیتي ځواکونو ته روحیه ورکړئ .