تاند ( چهارشنبه، د دلوې ۲۲) د آزادو سیالیو تکړه افغان مبارز لوبغاړی احمد ولي هوتک له خپل برازیلي سیال باربوسا سره سبا پنج شنبه لوبه ترسره کوي.
ولي هوتک په خپله فېسبوک پاڼه لیکلي چې، دا لوبه پنج شنبه د شپې په ۷ بجو د کابل په غازي لوبغالي کې ترسره کېږي.
هوتک دې لوبې ته د پوره چمتووالي ډاډ ورکوي او وایي چې له څلورو میاشتو راهیسې دې لوبې ته يې چمتووالی پيل کړي او هیله لري چې بریالی به هم شي.
هوتک وایي د لوبې لپاره امنیتي تدابیر نیول شوي او له افغانانو یې هيله وکړه چې، ده لپاره د بریا دعا وکړي.
هغه ډاډ ورکړی چې د عامو افغانانو په دعاوو سره به خپل برازیلي سیال ته ماته ورکوي.