تاند (سه شنبه د دلوې ۲۱) د وژل شوي خبریال یما سیاوش پلار داوود سیاوش د افغان حکومت تر څنګ په نړیوالې ټولنې نیوکه کوی چې د خپل زوی د وژنې د قضیې د بې طرفه څېړنې غوښتنه یې کړې وه، خو هغوی ورته تر اوسه مثبت یا منفي ځواب نه دی ورکړی.
داوود سیاوش نن په کابل کې یوې خبري ناستې ته ویلي، چې د افغانستان بانک له پېښې اتلس ورځې وروسته د امنیتي کمرو ویډیوګانې امنیتي بنسټونو ته استولي دي.
نوموړي ویلي، دا مناسبه نه ده چې حکومت د چوک له سره یو کس راولي او د زور او یا پیسو په واسطه هغه قانع کړي چې د دوی په خوښه څرګندونې وکړي او بیا یې پرېږدي.
د داوود سیاوش په خبره چې د ولسمشر اشرف غني دواړو مرستیالانو او د ملي امنیت عمومي رئیس ورته ویلي چې د یما سیاوش د وژنې په تور درې کسان نیول شوي، خو نوموړی وايي چې د کورنیو چارو وزیر بیا ورته په دې تړاو د یو نفر د نیول کېدو خبره کړې ده.
داوود سیاوش ټینګار کړی دی چې دی به تر هغو چیغې وهي څو پورې چې یې د زوی د وژنې قضیه په هر اړخیزه توګه څېړل شوې نه وي او قاتلین یې نه وي پېژندل شوي.
یما سیاوش د تېرې عقرب میاشتې په ۱۷مه سهار، هغه مهال چې دندې ته پر لاسه و د کابل په نهمه ناحیه کې د چسپکي ماین په چاودنه کې ووژل شو.