تاند (سه شنبه د دلوې ۲۱) ولسمشر غني او د هندوستان لومړی وزیر نرېندا مودي نن د یو ویډیويي کنفرانس له لارې د ۲۸۶ میلیون امریکایي ډالرو په ارزښت د شاتوت بند پروژه لاسلیکوي.
د ولسمشر د ویاند مرستیال دواخان مینه پال نن سه شنبه پر خپل ټوېټر لیکلي: «نن د افغانستان اسلامي جمهوریت او د هندوستان هېواد تر مینځ د کابل ولایت په للندر سیمه کې د د للندر(شاتوت) بند جوړولو تړون لاسلیکېږي.»
اخوا بیا هندي رسنیو ویلي چې دواړه مشران به د یادې پروژې د لاسلیک تر څنګ له تروریزم سره د مبارزې په برخه کې د هند او افغانستان په دوه اړخیزو همکاریو هم بحث وکړي.
شاتوت بند چې د کابل ولایت په للندر سیمه کې موقعیت لري، شاوخوا څلور زره هېکتاره ځمکې د خړوبولو او د کابل دوه میلیون وګړو ته د څښاک د اوبو برابرولو ظرفیت لري.
د معلوماتو له مخې دغه بند ۱۱۳ متره لوړوالی او ۶۰ متره پلنوالی لري چې په دوو کلونو کې به جوړ شي.
هندوستان تر دې وړاندې په هرات ولایت کې د سلما بند هم جوړ کړی چې په میلیونونو ډالر لګښت پرې راغلی دی.
شاتوت بند د کابل په چهاراسیاب ولسوالۍ کې موقعیت لري چې د ۱۵۰ میلیون متر مکعب اوبو د ذخیره کولو ظرفیت لري.