تاند (سه شنبه د دلوې ۲۱) د بهرنیو چارو وزارت وايي، نن سهار کابل ښار کې ددغه وزارت په موټر چاودنه شوې چې یو تن کارکوونکی یې په کې وژل شوی دی.
دغه چاودنه نن سهار شاوخوا ۹:۲۰ بجې د کابل ښار اړوند په زړو مکروریان سیمه کې د بهرنیو چارو وزارت د کارکوونکو په موټر شوې چې د یاد وزارت موټر چلوونکی په کې وژل شوی دی.
دغه وزارت وايي چې چاودنه د ځای پر ځای شوي ماین له امله رامنځته شوې ده.
د بهرنیو چارو وزارت د یوې خبرپاڼې په خپرولو سره دا پېښه غندلې او ویلي یې دي چې د ملکیانو وژل او په نښه کول د ټولو اسلامي او ملي اصولو خلاف عمل دی.
سرچینې زیاته کړې، که تاوتریخوالي کم او اوربند ته لاره هواره نه شي، د دغه ډول ترهګریزو پېښو او تاوتریخوالي زیاتېدو مسؤلیت به د طالبانو په غاړه وي.
تر اوسه ددغه برید مسؤلیت کوم چا نه دی منلی.