تاند ( دوشنبه، د دلوې ۲۰) په لغمان ولایت کې د څه باندې ۱۲ میلیونه افغانیو په لګښت د اکسیجن د تولید یوه دستګاه جوړېږي.
د دې دستګاه د جوړولو چارې یک شنبه ناوخته پيل شوې.
د دې دستګاه د کار د پیل پرمهال د لغمان ولایت د عامې روغتیا رئیس عبدالمعروف جلیلي وویلې، چې د اکسیجن د تولید دغه دستګاه د عامې روغتیا وزارت له بودیجې جوړېږي.
جلیلي وایي د دې دستګاه چارې به د درېو میاشتو په موده کې پای ته ورسېږي.
نوموړی وایي د یادې دستګاه په جوړېدو سره به په یوه وخت ۸۴ د ناروغانو تختونو ته اکسیجن برابر شي.
په ورته مهال د لغمان ولایت مرستیاله برېښنا ساپۍ وایي دوی هڅه کوي ورځ تربلې په دې ولایت کې د روغتیایي خدماتو کیفیت لوړ او د خلکو ستونزو ته رسیده ګي وکړي.
ځایی خلک هم د دې اقدام ستاینه کوي.
دوی وایي د دې دستګاه په جوړېدو سره به هغه ستونزې چې عامو خلکو به د اکسیجن د کمښت له امله درلودې یو څه حل شي.
د یادونې ده چې د کورونا د لومړۍ څپې پرمهال په ټول هېواد کې عامو خلکو د اکسیجن له کمښت نه شکایتونه لرل.