تاند(یکشنبه، د دلوې ۱۹) د راپورونو په اساس د غونډې د ځای سره شاوخوا مخابراتي او د انټرنیټ خدمات هم قطع شوي دي.
د پښتون ژغورنې غورځنګ PTM يو مشر او د پاکستان د پارلمان غړي، محسن داوړ نن، پر خپل ټويټر ليکلي چې وو، په بنو کې پولیسو هغه کسان نيولي چې غوښتل يې دې جلسې ته راشي.
پښتون ژغورنې غورځنګ د پېښور غونډه د ارمان لوڼي د دوهم تلين په مناسبت جوړه کړې ده.
لوڼی دوه کاله مخکې په بلوچستان کې د يوې مظاهرې په مهال ووژل شو.
د پښتون ژغورنې غورځنګ غړي وايي، چې نن یې د ارمان لوڼي د دویم تلین او د یاد غورځنګ د ځينو غړو د راخلاصېدو په پار غونډه کوله، خو تر غونډې مخکې یې ځینې مشران د پاکستاني پولیسو له لوري نیول شوي دي.
په پام کې وه، چې د پي ټي ایم له خوا د ارمان لوڼي د دویم تلین او د دوی د ځينو مشرانو د راخوشې کېدو یاده غونډه، د پېښور سپېرير ساینس کالج د لوبو په میدان کې ترسره شي.
څو ورځې وړاندې د کراچۍ پولیسو هم د پښتون ژغورنې غورځنګ شاوخوا ۵۰ غړي نیولي وو.
هم مهاله د پښتون ژغورنې غورځنګ یا پي ټي ایم مشر منظور پښتنین وايي، پر پښتنو د پاکستاني حکومت ظلمونه له حد اوښتي او نور وخت رارسیدلی، چې مونږ ورته ځواب ووایو.
د یاد غورځنګ غړو نن غوښتل، چې د شهید ارمان لوڼي دویم تلین او د غورځنګ د ځېنو غړو د راخلاصولو په موخه غونډه وکړي؛ خو د پاکستان پولیسو یې یو شمیر غړي نیولي او په ټاکلي ځای یې د غونډې اجازه نه ده ورکړې.
بل خوا د پښتون ژغورنې غورځنګ مخکښ مشر او د شمالي وزيرستان نه د قامي اسمبلۍ غړي محسن داوړ پرخپله ټوېټرپاڼه لیکلي، د PTI یو شمېر کسانو هڅه کوله د پیسو په بدل کې د PTM ضد شعارونه ورکړي او ستونزې جوړې کړي، خو پاکستاني پولیسو ددې خلکو د مخنیوي پرځای د ملا بهرام او زبیر شاه اغا په ګډون یې د پښتون ژغورنې غورځنګ غړي نیولي دي.
د یادونې ده، چې د پاکستان حکومت هر ځل د پښتون ژغورنې غورځنګ غړي ډېر کله په یو او بله پلمه نیسي، او غواړي له همدې لارې د یاد غورځنګ پر وړاندې خنډونه راپورته کړي.