تاند ( سه شنبه، د دلوې ۱۴)د کابل ښاروالۍ په یوه خبرپاڼه کې د کابل کرکټ نړيوال لوبغالي د جوړولو خبر ورکړی دی.
خبرپاڼه کې راغلي چې نن سه شنبه د کابل کرکټ نړيوال لوبغالي د مساحت معلومولو په موخه ساحه په نښه شوه.
سرچینه وایي چې ياد لوبغالی به د شپاړسمې ناحيې اړوند آلوخېلو سيمه کې په ۸۴ جريبه ځمکه د تخنيکي او تدارکاتي پروسې تر بشپړېدو وروسته په معياري کچه جوړ شي.
د سرچيني په حواله د دغې بنيادي او پراختيايي پروژې په پلي کېدو سره به د سيمې د خلکو په فرهنګي، ټولنيز، اقتصادي او سپورتي ژوند کې ژور بدلونونه رامينځ ته شي.
د کابل نړيوال کرکټ لوبغالي د جوړېدو خبره داسې حال کې کېږي چې لاهم په ننګرهار کې په ۲۷ جريبه ځمکه د کرکټ نړيوال لوبغالي د جوړېدو چارې په ټپه ولاړې دي.
د کرکټ شنونکي وایي کلونه کې چې ننګرهار د لوبغالي چارې پيل شوي خو دکرکټ بورډ د بې غورۍ له امله یې چارې ټکنۍ روانې دي.
دوی هیله ښودلې چې کرکټ بورډ به په هېواد دننه د کرکټ نړیوالو لوبو ته اسانتیاوې برابرې کړي.