تاند ( سه شنبه، د دلوې ۱۴) په کابل ښار کې نن سهار دوو چاودنو ۶ تنه ټپيان کړل.
امنیتي سرچینې وایي چې، لومړۍ چاودنه په دویمه ناحیه کې په یوه نظامي فورډ ډوله موټر شوې ده.
د سرچینو په خبره دویمه چاودنه هم د څلورمې ناحیې اړوند سلیم کاروان سیمې سره نږدې شوې ده.
عیني شاهدان وایي چې په لومړۍ چاودنه کې دوه امنیتي کسان ټپیان شوي دي.
بل لورته د کابل امنیه قومنداني وایي چې په دویمه پېښه کې څلور کسه ټپیان شوي دي.
د یادونې ده چې په دې وروستیو کې په کابل ښار کې د مقناطیسي ماینونو چاودنې ډېرې شوي او هره ورځ له یوه تر دوو چاودنې کېږي.
دغه راز د یوه بل خبر له مخې تازه څو شېبې وړاندې د پروان ولایت د امنیت د آمر پر موټر د مقناطیسي ماین چاودنه شوې ده.
امنیتي سرچینې وایي چې په دې پېښه کې عبدالواسع رحیمي ته کوم زیان نه دی اوښتی او نه هم نور تلفات لري.
د دې چاودنو مسوولیت هېڅ ډله نه مني.
خو افغان حکومت بیا د دې چاودنو پړه پر وسله والو طالبانو اچوي.
عام افغانان بیا له امنیتي مسوولینو غواړي څو په دې برخه کې جدي ګامونه پورته کړي څو د عامو خلکو ژوند خوندي شي.