تاند ( دوشنبه، د دلوې ۱۳) ملي دفاع وزارت وايي، د هېواد په درېیو ولایتونو کې د افغان ځواکونو د عملیاتو پر مهال ۴۹ وسلوال طالبان وژل شوي او یو شمېر نور یې ټپیان شوي دي.
دفاع وزارت د خبرپاڼې په خپرولو سره ویلي، د کندهار د ارغنداب، ډنډ او پنجوايي ولسوالیو اړوند سیمو کې د افغان ځمکني او هوايي ځواک بریدونو کې ۳۰ طالب جنګیالي وژل شوي او ۴ نور یې ټپیان شوي دي.
سرچینه زیاتوي، د یادو عملیاتو په ترڅ کې د طالبانو ګڼ شمېر وسلې، مهمات او د دوی له لوري پر سړکونو ځای پر ځای شوي ماینونه هم له منځه وړل شوي دي.
ملي دفاع وزارت دغه راز په یوه بله خبرپاڼه کې ادعا کوي چې د هلمند ولایت ناوې ولسوالۍ اړوند په عینک او ګرونج کلا سیمو کې وسلوالو طالبانو غوښتل پر افغان ځواکونو برید وکړي، خو مقاومت سره مخ شوي او د یادې ډلې د یوه سرګروپ مولوي احسان په ګډون یې ۱۳ جنګیالي وژل شوي دي.
په ورته وخت کې ملي دفاع وزارت د بلې خبرپاڼې په خپرولو سره ویلي، تېره ورځ د فراه ولایت پیشترود ولسوالۍ اړوند د ګجکین او ګسکین کلیو کې افغان ځواکونو ځانګړي عملیات ترسره کړي چې په ترڅ کې یې ۶ وسلوال طالبان وژل شوي او ۵ تنه نور ټپیان شوي دي.
خبرپاڼه کاږي، د یادو عملیاتو پر مهال د طالبانو وسلې، مهمات او له لوري یې پر سړکونو ځای پر ځای شوي ماینونه هم له منځه وړل شوي دي.
طالبانو تر اوسه د ملی دفاع وزارت د یادو ادعاوو په اړه کوم غبرګون ندی ښودلی.