تاند (پنجشنبه د دلوې ۹) د افغانستان د پوځ لوی درستیز یاسین ضیا د ایران د ملي امنیت سلاکار علي شمخاني هغو خبرو ته په غبرګون کې ویلې چې طالبان او د دغې ډلې مشران له امریکا سره مبارزې ته ژمن دي.
لوی درستیز یاسین ضیا نن پنجشنبه د شمخاني له ټویټ سره لیکلي دي چې له افغان جګړې د ایران د ملي امنیت د سلاکار درک ناسم دی، ځکه د ده په وینا، طالبان د افغانانو پر وړاندې جنګېږي نه د امریکا پر وړاندې.
متأسفانه درک و فهم شما @alishamkhani_ir به عنوان دبیر شورای عالی امنیت ملی ایران نسبت به جنگ جاری در افغانستان نادرست است. طالب در برابر امریکا نی، بلکه در برابر مردم افغانستان میجنگد. ما در برابر هر گروه از دشمنان مردم افغانستان با قاطعیت عمل میکنیم https://t.co/og0jolCDyI
— Yasin Zia (@GenYasinZia) January 28, 2021
نوموړي زیاته کړې، افغان ځواکونه د افغانستان د دښمنانو پر وړاندې هر ډول مبارزې ته ژمن او تیار دي.
د ایران د ملي امنیت سلاکار دغه څرګندونې له ملابرادر سره تر کتنې وروسته کړي دي او له امریکا سره یې د طالبانو پیاوړې مبارزه او نه ماتېدونکې اراده ستایلې ده.
اخوا بیا د ولسمشر اشرف غني سلاکار شاه حسین مرتضوي هم ویلي چې په تیر یوه کال کې هېڅ امریکايي عسکر نه دی وژل شوی، نو د افغانانو د وژنې لپاره باید د طالبانو اراده ونه ستایل شي.
د یادونې وړ ده چې د ملا برادر په مشرۍ د طالبانو یو پلاوی ایران ته تللی دی او په دغه هېواد کې یې له ایراني چارواکو سره خبرې کړې دي.