تاند (سه شنبه د دلوې ۷) افغانستان له تاریخي پلوه په یو مهم پړاو کې دی او د سولې پر سر روانو خبرو په دغه هېواد کې د څو لسیزو جګړو د ختمولو لپاره یو مهم فرصت رامنځته کړی.
ملګري ملتونه وايي، افغانستان کې اوږدې جګړې دغه هېواد ته خورا مالي او ځاني زیانونه ورسول او اوس ددې وخت دی، چې افغانان د خبرو له لارې یوې دایمي سولې ته ورسیږي.
په سیاسي او سولې چارو کې د دې سازمان مرستیاله روزماري ډیکارلو ویلي: “که څه هم افغانستان ته د سولې لپاره یو مهم فرصت په لاس ورغلی، خو بیا هم د تاوتریخوالي اوسنۍ لوړه کچه د دې هېواد د کړکېچن وضعیت ښکارندويي کوي. ملګري ملتونه په ټول توان هڅه کوي چې د افغانانو ترمنځ سیاسي جوړجاړي ته رسېدو کې مرسته وکړي.”
روزماري ډیکارلو په داسې حال کې دغه څرګندونې کوي، چې تېره ورځ اروپايي ټولنې هم سولې ته د رسېدو لپاره د ریښتینو خبرو د پیلېدو غوښتنه کړې وه.
ملګري ملتونه د کړکېچ له زیاتېدو سربېره، په تېر ۲۰۲۰ کال کې د جګړو له کبله په افغانستان کې له خپلو کورونو څخه د ۳۸۰زره کسانو له بېځایه کېدو خبر ورکوي.
له يوې خوا ملګري ملتونه په افغانستان کې روان وضعیت کړکېچن بولي، بل خوا بیا اروپايي ټولنې سولې ته د رسېدو لپاره د ریښتنو خبرو د پیل غوښتنه کړې.
تېره ورځ د افغانستان لپاره د اروپايي ټولنې ځانګړي استازي رولانډ کوبیا په خپله ټویټرپاڼه لیکلي وو: “په دوحه کې د سولې لپاره ریښتنې خبرې باید له سره پیل او د باور رامنځتهکولو او په تدریجي ډول د پرمختګ پر لور روانې شي، د دې پر ځای چې د یوه بل پر وړاندې دفاعي حالت غوره او له نور ډېر امتیاز وغوښتل شي. دا حالت به یوازې جګړه او د قربانیانو شمېر یې زیات کړي.”
اروپايي ټولنه داسې مهال په قطر کې د سولې د ریښتنو خبرو د پیل غوښتنه کوي، چې د قطر په پلازمېنه دوحه کې له تېرو ۹ ورځو راهیسې د افغانستان اسلامي جمهوریت او طالبانو مرکچي پلاوو هیڅ غونډه نه ده کړې.