تاند( سه شنبه، د دلوې ۷) عامې روغتیا وزارت وايي، چې د تېر ۲۰۲۰ کال په اوږدو کې شاوخوا ۵۰۰۰ افغانانو د ککړې هوا له کبله خپل ژوند د لاسه ورکړی دی.
د یاد وزارت د معلوماتو له مخې، وژل شویو کسانو تر ډېره د تنفسي او زړه ناروغیو له کبله چې د ککړې هوا له امله انسان پرې اخته کیږي ژوند بایللی دی.
د عامې روغتیا وزارت مرستیاله ویانده معصومه جعفري تاند سره خبرو کې وايي، چې د ککړې هوا په تیر ۲۰۲۰م کال کي د نیږدې ۵۰۰۰ افغانانو ژوند اخیستی دی.
دا په داسې حال کې ده، چې تېر کال کابل په نړۍ کي یو له هغو ښارونو څخه وو چي د هوا د ککړتیا کچه پکې تر ټولو لوړه ښودل شوې وه.
د عامې روغتیا وزارت د معلوماتو له مخې، د یادو قربانیانو له ډلې یوازې ۱۰ سلنه یې په پلازمېنه کابل کي دي.
افغان حکومت په یو تازه اقدام کې د بېلا بېلو ادارو یو جوړښت رامنځته کړی، چي په کابل ښار کي د هوا د ککړتیا د مخنیوي لپاره ګډ کار وکړي.
د یاد اقدام په لړ کې د چاپېریال ساتنې اداره وايي، چي ۱۶۶ هغه لوړپوړیزې ودانۍ یې بندې کړې دي، چي د دوی سپارښتنې یې نه ديعملي کړې.
د روغتیا د نړیوال سازمان د وروستیو شمېرو له مخې، هر کال ۸,۲ میلیونه خلک د ککړې هوا له امله په نړۍ کي خپل ژوند له لاسه ورکوي.