تاند (شنبه د دلوې ۵) ولسمشرۍ ماڼۍ د افغانستان بانک د کارکوونکو پر موټر چاودنه په کلکو ټکو غندلې ده.
ارګ د یوې خبرپاڼې په خپرولو سره ویلي چې په هېواد کې د روان تاوتریخوالي په ځانګړې توګه د هدفي وژنو، ماین چاودونو او نورو ترهګریزو پېښو مسؤل طالبان دي.
خبرپاڼه کې د ولسمشر غني له قوله راغلي چې په ملکي کارکوونکو بې رحمانه بریدونه، په ښارونو کې د چسپکي ماین چاودنې او نور ترهګریز فعالیتونه له افغان ولس سره د طالبانو ښکاره دښمني ثابتوي.
ښاغلي غني زیاته کړې چې طالبان په خپل انکار سره د دې بریدونو له مسؤلیته خپلې اوږې نه شي سپکولی.
بله خوا د افغانستان بانک وايي چې نن یکشنبه د بانک د مالي شخړو د حل کمېسیون د رئیس پر موټر د چسپکي ماین چاودنه شوې چې له کبله یې يو ساتونکی وژل شوی دی.
د یاد بانک له لوري په خپره شوې خبرپاڼه کې راغلي چې په دې پېښه کې د افغانستان بانک د مالي شخړو د حل کمېسیون رییس عبدالله دورانی او يو بل کس ټپیان شوي هم دي.
دغه چاودنه نن سهار شاوخوا ۸:۱۵ بجې د کابل ښار د اتمې حوزې اړوند د شاه شهيد سيمې درېيم سړک کې پر یوه لنډکروزر ډوله موټر شوې.
د کابل د امنیه قومندانۍ ویاند فردوس فرامرز په وینا د پېښې له ځايه درې ټپيان روغتون ته لېږدول شوي دي.
تر اوسه کوم چا یا ډلې ددې پېښې مسؤلیت نه دی منلی.
د یادونې وړ ده چې د روان کال د عقرب مياشتې په ۱۷ هم د افغانستان بانک د کارکوونکيو پر موټر د چسپکي ماين چاودنه وشوه چې له کبله يې د ياد بانک د عامه اړيکو سلاکار يماسياووش او دوه نور همکاران ووژل شول.
د يادې چاودنې مسؤليت هم تر اوسه چا پر غاړه نه دی اخيستی او حکومت هم تر اوسه په دې هکله ځواب نه دی ورکړی.