تاند(پنجشنبه، د دلوې ۲) د جاپان سوني کمپنۍ د ډرون یا بې پېلوټه الوتکو د سیالۍ میدان ته راووتله او د فلم اخیستو لومړنی ډرون یې بشپړ کړ.
د سوني دا ډرون الوتکه ایرپیک نومېږي او د فلم اخیستو لپاره جوړه شوې ده. دا ډرون به د روان میلادي کال په پسرلي کې بازار ته وړاندې شي.
سوني په حقیقت کې د چین له ډي جي آی سره د سیالۍ لپاره دا ډرون جوړ کړی دی. ډي جي آی اوس په نړۍ کې د فلم اخیستو تر ټولو ښه ډرونونه جوړوي.
ډي جي آی کمپنۍ په وروستیو کې په امریکا کې له یو لړ بندیزونو سره مخامخ شوې او سوني شرکت غواړي چې له دې فرصته ګټه واخلي او د امریکا بازارونه خپل کړي.
د سوني ډرون په مصنوعي ذهانت سمبال دی او د سوني الفا کمرې پکې نصب دي.
ایرپیک څلور انجنونه لري او د مصنوعي ذهانت په وسیله خپل حرکت اصلاح کولی او په بیړني حالت کې سمولی شي.
د سوني دا ډرون یوه نیمګړتیا لري او هغه دا ده چې کمره باید ورته جلا واخیستل شي. ډي جي آی د دې ترڅنګ چې سپک دی په یو وار چارج ۳۰ دقیقې الوتلی او له مځکې نژدې ۵۰۰ متره لوړېدای شي.
همداراز د کنټرول له ځایه تر ۷ کیلومترو پورې لېري تللی شي.