تاند (پنجشنبه د جدي ۲۵) د افغانستان د ملي دفاع وزارت وايي، افغان کومانډو ځواکونو په هلمند ولایت کې د طالبانو په یوه زندان عملیات کړي دي.
د ملي دفاع وزارت نن پنجشنبه د یوې خبرپاڼې په خپرولو سره ویلي، افغان کومانډویانو تېره شپه د هلمند په واشېر ولسوالۍ کې د طالبانو په یوه زندان عملیات وکړل چې په پایله کې یې د یوه پولیس په ګډون ۱۳ تنه چې له یادې ډلې سره بندیان و راخوشې کړل.
خبرپاڼه زیاتوي، په دې عملیاتو کې د طالبانو یو کرولا موټر، درې موټر سایکل او یوه ایکم مخابره د افغان ځواکونو لاس ته ورغلې ده.
د یادونې وړ ده چې تر دې وړاندې د ملي دفاع وزارت په لوګر ولایت کې د طالبانو د ماین جوړولو د یوې لویې کارخانې د له منځه وړلو خبر هم ورکړی و.
دې وزارت پرون چهارشنبه په یوه خبرپاڼه کې ویلي و چې د طالبانو د ماین جوړولو دغه کارخانه د لوګر د مرکز اړوند سپیڅ سیمه کې د کومانډو ځواکونو په ځانګړو عملیاتو کې کشف او له منځه وړل شوې ده.
طالبانو تر اوسه ددغو ادعاوو په هکله کوم څه نه دي ویلي.