تاند ( چهارشنبه، د جدي ۱۷) د امریکا د خزانې وزارت ویلي چې د ایران د بېړۍ چلولو پر شرکت او د ایران د وسپنې له صعنت سره پر تړلو ۱۶ شرکتونو یې بندیزونه وضع کړي دي.
سرچینه وایي چې د یاد هېواد د بېړۍ چلولو شرکت په دې تورن دی چې پر ایران له وضع شوو بندیزونو یې سرغړونه کړې ده.
د سرچینې په خبره دې شرکت سرغړونې په صورت کې ایران ته داسې توکي لېږدولي چې په بندیزونو کې شامل دي.
د امریکا د خزانې وزارت زیاتوي دغه راز امریکا پرېکړه کړې چې له بندیزونو د سرغړونې او پر ایران د فشار لپاره شپاړس نور شرکتونه هم د بندیزونو په لېست کې راولي.
ایران د امریکا پر دغه پرېکړه تر دې دمه غبرګون نه دی ښودلی.
د امریکا او ایران ترمنځ اړیکې په دې وروستیو کې خورا ترینګلې شوي او دواړو هېوادونو یو بل ته ګواښونه هم ډېر کړې دي.
دا په داسې حال کې ده چې د یو شمېر رسنیو د راپورونو له مخې تازه ایران د لومړي ځل لپاره د بې پیلوټه (ډرون) الوتکو فوځي تمرینونه ترسره کړي دي.
رسنۍ وایي چې د ایران له لوري جوړې شوې دغه الوتکې له هوا څخه ځمکنۍ او په فضا کې د هدف په نښه کولو وړتیا لري او همداراز کولی شي توغندي هم له ځان سره ولېږدوي.