تاند (شنبه د جدي ۱۳) د امریکا د بهرنیو چارو وزیر مایک پومپیو وايي، له نژدې یوه کال راهیسې په افغانستان کې هېڅ امریکايي سرتیری نه دی وژل شوی.
پمپیو د سولې مذاکراتو ته په کتو په خپله ټوېټرپاڼه لیکلي چې افغانان د خبرو اترو په حال کې دي، څو یوې هوکړې ته ورسېږي.
No U.S. servicemen have been killed in Afghanistan in almost a year, and Afghans are finally discussing peace and reconciliation among themselves. Such incredible progress. #DiplomacyStrong #AmericaFirst pic.twitter.com/zRLuzXIlPp
— Secretary Pompeo (@SecPompeo) January 2, 2021
مایک پمپیو داسې مهال دغه څرګندونې کړي چې په دې وروستیو کې د افغان ځواکونو او وسله والو طالبانو تر منځ نښتې زیاتې شوي دي.
تېر ۲۰۱۹ کال په افغانستان کې د وژل شویو امریکايي سرتېرو شمېر ۲۰ تنه ښودل شوی و.
په دوحه کې د امریکا او طالبانو تر منځ د شوې هوکړې له مخې طالبانو پر امریکايي ځواکونو بریدونه ودرول، خو له افغان پوځ سره یې په ډېرو ولایتونو کې اوس هم نښتې دوام لري.
له امریکا سره د طالبانو تر هوکړې وروسته د ۱۳۹۹ کال د سنبلې میاشتې په ۲۲مه د حکومت او طالبانو تر منځ د سولې خبرې پیل شوې چې د درې میاشتو لپاره یې دوام وکړ او پر اجنډا تر هوکړې وروسته د ۱۵ ورځو لپاره وقفه اعلان شوه.
ټاکل شوې چې د افغان دولت او طالبانو د مرکچي ټیمونو تر منځ د سولې دویم پړاو خبرې د روانې جدي میاشتي په ۱۶ په دوحه کې پیل شي.
که څه هم د افغانستان حکومت په دویم پړاو مذاکراتو کې پر اوربند ټینګار کوي خو طالبانو تر اوسه په دې هکله کوم څه نه دي ویلي.