تاند (شنبه د جدي ۱۳) د افغانستان د ملي دفاع وزارت وايي، په هلمند ولایت کې د طالبانو د سل کسيزې قطعې د يوه قوماندان په ګډون ۵۰ طالبان وژل شوي دي.
دفاع وزارت نن شنبه د یوې خبرپاڼې په خپرولو سره ویلي، په تېرو ۲۴ ساعتونو کې د هلمند مرکز لښکرګاه ته نژدې په سور ګودر، بشران سیمو او دغه راز ناوې، ګرمسېر او نادعلي ولسوالیو کې د افغان ځواکونو او طالبانو تر منځ نښتې شوې دي.
د خبرپاڼې د مالوماتو له مخې، په دغه نښتو کې د هوايي ځواک په ملاتړ د طالبانو د یوې سل کسیزه ډلې د قوماندان عبدالسلام او درې ماین اېښودونکو په ګډون ۵۰ طالبان وژل شوي او ۸ نور ټپیان دي.
سرچینه زیاتوي، قومندان عبدالسلام تر دې وړاندې د کجکي لپاره د طالبانو ولسوال و چې اوس مهال په ناوه کې پر امنیتي پوستو د برید پر مهال ووژل شو.
یاد وزارت وايي، ددې بریدونو پر مهال د طالبانو ۸ پتڼځایونه، ګڼ شمېر وسلې، وسایط او زیات شمېر رهبري شوي راکټونه هم له منځه وړل شوي دي.
وسله والو طالبانو تر دا مهاله د هلمند جګړې په اړه هم تبصره نه ده کړې.