تاند(شنبه،د جدي ۱۳) د افغانستان کرکټ بورډ وایي، ولسمشر محمد اشرف غني راشد خان ته د ستر دولتي مډال د ورکړې حکم ورکړ.
د افغانستان د کرکټ بورډ په وړاندیز او د ولسمشر د ځانګړي حکم له مخې ټاکل شوې د ملي لوبډلې وتلي ستورې راشد خان ته ستر دولتي مډال ورکړل شي.
د افغانستان کرکټ بورډ وایي، ولسمشرغني د چارو ادارې ته سپارښتنه کړې ترڅو د کرکټ نړیوالې شورا له لورې د ملي اتل راشد خان د وروستیو سترو لاسته راوړنو او ویاړونو له امله هغه ته د ستر دولتي مډال د ورکړې لړۍ ژر تر ژره پیل کړي.
دا په داسې حال کې دی چې د افغانستان د کرکټ ملي لوبډلې وتلی ستوری راشد خان څو ورځې وړاندې د کرکټ د نړیوالې شورا له خوا په شل اوریزو لوبو کې د تېرې یوې لسیزې تر ټولو غوره لوبغاړی اعلان شو.
د افغانستان د کرکټ د ملي لوبډلې ځلانده ستوری راشد خان چې له تېرو پنځو کلونو راهیسې د نړۍ په کچه د افغانستان لپاه لوبې کوي، د نوموړي دغه مقام ټوله نړۍ ګوته په غاښ کړې چې راشد خان وکولای شو په پنځو کلونو کې د تېرې یوې لسیزې غوره لوبغاړی شي.