تاند (شنبه، د جدي ۱۳) د افغانستان کرکټ بورډ په یوه خبرپاڼه کې وايي چې، ولسمشر غني د جمهوري ریاست د چارو ادارې ته سپارښتنه کړې څو د کرکټ ملي ټيم لوبغاړي راشد خان ته د هغه د وروستيو لاسته راوړنو له امله د ستر دولتي مډال د ورکړې لړۍ ژر بشپړ کړي.
کرکټ بورډ وايي چې یاد مډال به د ولسمشر له لوري د یو لړ ځانګړو مراسمو په ترڅ کې راشد خان ته ورکړل شي.
راشد خان هم تېره ورځ په یوه ټوېټ کې له ولسمشر نه مننه کړې وه چې د ده هڅې یې ستایلي.
راشدخان ته د دې مډال د ورکړې حکم داسې مهال صادرېږي چې تازه یې د لسیزې غوره لوبغاړو کې د افغانستان بیرغ لوړ کړی او نوم یې پکې راغلی دی.
راشد خان اوسمهال د نړۍ په ستر مشهور سوداګریز لیګ بېګ باش کې لوبېږي.
هغه تازه د سټار سپورټس له لوري برابرې شوې الټایمېټ سیالیو کې هم اتلولي ګټلې ده.