تاند ( جمعه، د جدي ۱۲) افغان او پاکستاني مسوولان یو ځل بیا د سوداګرۍ او ترانزیټ برخه کې د خپلمنځي تړون « اپټکا» پر تعدیل خبرې کړې دي.
دا خبرې د دواړو لوریو ترمنځ اسلام اباد کې د سوداګرۍ او ترانزیټ هوکړې د همغږۍ کمېټې اتمه ناسته کې کړې دي.
په دې ناسته کې هوکړه شوې چې د دواړو هېوادونو د مرکچي ټیمونو د تخنیکي پلاوي غړي به د یاد تړون د تعدیل طرحه کې د وړاندیزونو د شاملېدو لپاره بېلابېلې ناستې کوي.
په دې برخه کې د افغانستان د پلاوي مشري د سوداګرۍ او صنعت وزیرنثاراحمد غوریاني او د پاکستاني پلاوي مشري د دغه هیواد د سوداګرۍ وزیر رزاق داوود کوي.
نثاراحمد غوریاني د اپټکا په تړاو د ناستې په څنډه کې د پاکستان له لومړي وزیر عمران خان او د سوداګرۍ خونې له مسوولینو سره هم لیدلي دي.
د افغانستان او پاکستان د ترانزیټ او سوداګرۍ تړون په ۲۰۱۰ کال کې لاسلیک شوی خو افغان سوداګر وايي دغه تړون یې پاکستان سره د سوداګرۍ او ترانزیټ برخه کې ستونزې نه دي حل کړې.
په لومړیو کې د دواړو هېوادونو ترمنځ د ګمرکي همکاریو دې تړون لاسلیک سره د دواړو هېوادونو چارواکو تمه ښودلې وه چې له دې سره به دوه اړخیزه سوداګري او د افغان ترانزیت تجارت برخه کې ستونزې کمې شي.
دغه تړون داسې مهال لاسلیک شوی، چې ټاکلې ده د پاکستان لومړی وزیر عمران کابل ته ولاړ شي.
د پاکستان سوداګرۍ وزیر محمد صالح احمد فاروقي د اپټکا یا د افغانستان او پاکستان ترمنځ د ټرانزيټ او سوداګرۍ تړون په اوومه غونډه کې ویلي وو چې هېواد یې له افغانستان سره د سوداګرۍ نوره پراختیا هم غواړي.
دا تړون د ۲۰۲۱ کال په فبرورۍ میاشت کې پای ته رسېږي.