تاند ( پنج شنبه، د جدي ۱۱) د لغمان ولایت په مرکز مهترلام ښار کې د هیلې په نوم یوه راډیو د جواز نه لرلو له امله وتړل شوه.
مسوولان وایي چې دا راډیو د اترا ادارې په مشرۍ د ګډ پلاوي له لوري وتړل شوه.
د اترا ادارې مسوولان وایي چې یادې راډیو له اوږدې مودې راهیسې په لغمان کې له جواز پرته خپرونې کولې او د دوی له پرله پسې خبرداریو سره- سره یې هم له قانون څخه سرغړونه کوله.
سرچینه زیاتوي چې دوی چهارشنبه د ګډ پلاوي په ملتیا یاده راډیو وتړله او په خبره یې تر جواز اخيستو پورې به تړلې وي.
د دغې راډیو مسوولینو ته هدایت ورکړل شو چې د اترا ادارې د فریکونسۍ جواز ژر تر ژره ترلاسه کړي او له هغې وروسته قانوني خپرونې وکړي.
بل لورته د ولایت ویاند اسدالله دولت زی هم وایي چې هیله راډیو دجواز نه لرلو په خاطر تړل شوې ده.
د یادې راډیو مسوولانو تر اوسه په دې اړه رسنیو ته څه نه دي ویلي.
دی زیاتوي دا راډیو به تر هغې تړلې وي کله چې جواز ترلاسه کړي.